¹ URasheli wabona ukuthi wayengamzaleli uJakobe abantwana, uRasheli waba nomhawu ngodadewabo, wathi kuJakobe: Ngiphe abantwana, uma ungangiphi, ngizokufa.

² Intukuthelo kaJakobe yayisivuthela uRasheli, wayesethi: Ngisesikhundleni sikaNkulunkulu okwenqabela isithelo sesizalo na?

³ URasheli wathi: Nansi inceku yami uBiliha; ngena kuye, ukuze azalele emathangeni ami, ngakheke nami ngaye.

⁴ Wayesemupha uBiliha incekukazi yakhe, abe ngumkakhe; uJakobe wangena kuye.

⁵ UBiliha wakhulelwa, wazalela uJakobe indodana.

⁶ Wayesethi uRasheli: UNkulunkulu ungahlulele, futhi wezwa izwi lami, wangipha indodana. Ngakhoke waqamba igama layo ngokuthi uDani.

⁷ UBiliha, incekukazi kaRasheli, wabuye wakhulelwa, wazalela uJakobe indodana yesibili.

⁸ URasheli wayesethi: Ngokubambana ngibambene nodadewethu ngamandla kaNkulunkulu, ngamehlula; waqamba igama layo ngokuthi uNaftali. .

⁹ ULeya esebonile ukuthi ukhawulile ukuzala, wathatha uZilipha incekukazi yakhe, wamupha uJakobe, abe ngumkakhe.

¹⁰ UZilipha incekukazi kaLeya wazalela uJakobe indodana.

¹¹ ULeya wayesethi: Kuza ibutho! Waqamba igama laleyondodana ngokuthi uGadi.

¹² UZilipha incekukazi kaLeya yazalela uJakobe indodana yesibili.

¹³ Wayesethi uLeya: Yisibusiso sami! Ngokuba amadodakazi ayongibiza ngobusisiweyo. Waqamba igama layo ngokuthi u-Asheri.

¹⁴ URubheni, ngezinsuku zokuvuna ukolweni, waya wafumana amamandragora endle, wawayisa kuLeya unina. URasheli wayesethi kuLeya: Ake ungiphe amanye amamandragora endodana yakho.

¹⁵ Kepha uLeya wathi kuye: Kuncane yini ukuba uthathile umyeni wami na? Usuzothatha namamandragora endodana yami na? URasheli wathi: Ngalokho (uJakobe) uzolala nawe ngalobubusuku ngamamandragora endodana yakho.

¹⁶ Kusihlwa uJakobe wabuya endle, uLeya waya ukumhlangabeza, wathi: Ngena kimi, ngokuba impela ngikuqashile ngamamandragora endodana yami. Walala naye ngalobobusuku.

¹⁷ UNkulunkulu wamuzwa uLeya; wakhulelwa, wamzalela uJakobe indodana yesihlanu.

¹⁸ Wayesethi uLeya: UNkulunkulu unginikile umvuzo, lokhu ngamnika umyeni wami incekukazi yami; waqamba igama layo ngokuthi u-Isakhare.

¹⁹ ULeya wabuye wakhulelwa, wazalela uJakobe indodana yesithupha.

²⁰ Wayesethi uLeya: UNkulunkulu ungiphe isipho esihle; manje umyeni wami usezohlala kimi, ngokuba ngimzalele amadodana ayisithupha; waqamba igama layo ngokuthi uZebhuloni.

²¹ Ngemuva kwalokho wazala indodakazi, waqamba igama layo ngokuthi uDinah.

²² UNkulunkulu wamkhumbula uRasheli, uNkulunkulu wamuzwa, wavula isizalo sakhe.

²³ Wakhulelwa, wazala indodana, wathi: UNkulunkulu ususile ihlazo lami.

²⁴ Waqamba igama layo ngokuthi uJosefa, ethi: UJehovah makangenezelele ngenye futhi indodana.

²⁵ Kwathi uRasheli esemzalile uJosefa, uJakobe wathi kuLabani: Ngimukise ukuba ngiye endaweni yami ezweni lakithi.

²⁶ Ngiphe omkami nabantwana bami engikusebenzelile ngabo, ngihambe, ngokuba uyawazi umsebenzi engikwenzele wona.

²⁷ ULabani wayesethi kuye: Ake ngifumane umusa emehlweni akho. Sengibonile ukuthi uJehovah ungibusisile ngenxa yakho.

²⁸ Wathi futhi: Nquma umvuzo wakho, ngikuphe wona.

²⁹ UJakobe wathi kuye: Uyazi wena ukuthi ngikusebenzele kanjani, nokuthi izinkomo zakho zazinjani kimi.

³⁰ Ngokuba wawunezinkomo eziyingcosana ngingakafika, kodwa manje sezandile, seziziningi. UJehovah ukubusisile ezinyathelweni zami; manje ngiyoyisebenzela nini eyami indlu na?

³¹ ULabani wathi: Ngizokuphani na? UJakobe wathi: Awuyukunginika lutho; kepha uma ungenzela lokhu, ngiyobuye ngeluse umhlambi wakho, ngiwulinde.

³² Namuhla ngiyodabula emhlambini wakho wonke, ngikhiphe kuwo zonke ezimanakanaka nezimagqabhagqabha, nazozonke izimvu ezimnyama, nezimbuzi ezimagqabhagqabha nezimanakanaka, kube ngumvuzo wami.

³³ Ukulunga kwami kuyongifakazela ngesikhathi esizayo, lapho ufika uzobheka umvuzo wami ophambi kwakho, ukuthi zonke izimbuzikazi ezingemanakanaka nezingemagqabhagqabha, nezimvu ezingemnyama; lezi makuthiwe zebiwe yimi.

³⁴ Wayesethi uLabani: Bheka makube njengezwi lakho.

³⁵ Ngalowomuhla wakhipha izimpongo ezinemishwe nezimagqabhagqabha, nazozonke izimbuzikazi ezimanakanaka nezimagqabhagqabha, zonke ezinobumhlophe, nezimvu ezimnyama, wazinikela esandleni samadodana akhe. .

³⁶ Wamisa ibanga lezinsuku ezintathu phakathi kwakhe noJakobe; uJakobe welusa imihlambi eseleyo kaLabani.

³⁷ UJakobe wazithathela izinti ezimanzi zomphophula nezomalimondi nezomphelathani, wazebula imishwe emhlophe, wambula okumhlophe okusezintini.

³⁸ Wafaka izinti azebulile emikhombeni nasemiqengqeni yamanzi phambi kwemihlambi, lapho imihlambi iza khona ukuzophuza; imihlambi yaya ngokuya iqhanyelwa lapho iyophuza.

³⁹ Imihlambi yamitha phambi kwezinti, imihlambi yazala ezinemishwe, nezimanakanaka, nezimagqabhagqabha.

⁴⁰ UJakobe wayesahlukanisa amawundlu, wabhekisa ubuso bemihlambi kwezinemishwe nakwezimnyama emhlambini kaLabani; wabeka amaqembu akhe abawodwa wangawafaka emhlambini kaLabani.

⁴¹ Kwakuthi njalo lapho umhlambi uqhanyelwa—umhlambi owabuthana kuqala—uJakobe abeke izinti phambi kwamehlo omhlambi emqengqeni ukuze uqhanyelwe phakathi kwezinti.

⁴² Phambi kwamehlo omhlambi owabuthana kamuva kazibekanga izinti ; lowomhlambi owabuthana kamuva kwakungokaLabani, kanti umhlambi owabuthana kuqala kwakungokaJakobe.

⁴³ Lendoda yayisikhula kakhulu ngokwedlulele, yaba nemihlambi emikhulu, nezincekukazi, nezinceku, namakameli, nezimbongolo.

¹ Wayesezwa amazwi amadodana kaLabani, ethi: UJakobe uthathile konke okwakungokukababa; ngokwakungokukababa uzizuzele yonke lengcebo.

² UJakobe wabona ubuso bukaLabani; bheka babungasenengayizolo nakuthangi kuye.

³ UJehovah wayesethi kuJakobe: Buyela ezweni lawoyihlo nasezihlotsheni zakho; ngiyokuba nawe.

⁴ UJakobe wathuma, wabiza uRasheli noLeya ukuba beze endle, emhlambini wakhe.

⁵ Wathi kubo: Ngiyabubona ubuso bukayihlo ukuthi kabusenjengayizolo nakuthangi kimi, kepha uNkulunkulu kababa unami.

⁶ Niyazi nina ukuthi ngimkhonzile uyihlo ngawowonke amandla ami.

⁷ Kepha uyihlo ungikhohlisile, waguqula umvuzo wami ngezindlela eziyishumi; kodwa uNkulunkulu kamvumelanga ukwenza okubi kimi.

⁸ Ukuba ubesho ukuthi: Ezimanakanaka ziyokuba wumvuzo wakho, umhlambi wonke wazala ezimanakanaka; ukuba ubesho ukuthi: Ezinemishwe ziyokuba wumvuzo wakho, umhlambi wonke wazala ezinemishwe.

⁹ Kanjalo uNkulunkulu uthathile imfuyo kayihlo, wayinika mina.

¹⁰ Kwathi-ke, lapho umhlambi uqhanyelwa, ngaphakamisa amehlo ami, ngabona ephusheni; bheka, izimpongo ezikhwele umhlambi zazingezinemishwe , nezimanakanaka, nezinala.

¹¹ Ingelosi kaNkulunkunkulu yathi kimi ephusheni: Jakobe! Ngathi: Bheka, ngilapha.

¹² Yayisithi: Awuphakamise amehlo akho, ubone ukuthi zonke izimpongo ezikhwele umhlambi zingezinemishwe, nezimanakanaka, nezinala, ngokuba ngibone konke uLabani akwenza kuwe.

¹³ NginguNkulunkulu waseBethele, lapho wagcoba khona insika, lapho wenza khona isethembiso kiMi; vuka manje, usuke kulelizwe, ubuyele ezweni lokuzalwa kwakho.

¹⁴ ORasheli noLeya baphendula bathi kuye: Sisenesabelo nefa endlini kababa na?

¹⁵ Asibalwanga njengabafokazi na? ngokuba wathengisa ngathi, wabhuqa intengo yethu.

¹⁶ Ngokuba yonke ingcebo uNkulunkulu ayihlwithe kubaba ingeyethu neyabantwana bethu; manje konke uNkulunkulu akutshele khona, kwenze.

¹⁷ UJakobe wayesesukuma, wakhwelisa amadodana akhe, nabakakhe emakamelini.

¹⁸ Wathatha yonke imfuyo ayizuzile, imfuyo yokufuya kwakhe ayizuze e -Phadani-Aramu, ukuba aye ku-Isaka uyise ezweni laseKhanani.

¹⁹ ULabani esehambile ukuyogunda izimvu zakhe, uRasheli weba itherafim kayise.

²⁰ UJakobe weba inhliziyo kaLabani umAramu, ngokungamtsheli ukuthi uyabaleka.

²¹ Wayesebaleka nakho konke anakho; wasuka, wawela umfula, waqonda ngasentabeni iGileyadi.

²² Ngosuku lwesithathu uLabani watshelwa ukuthi uJakobe ubalekile.

²³ Wayesethatha abafowabo, wamlandela ibanga lezinsuku eziyisikhombisa, wamfica entabeni iGileyadi.

²⁴ UNkulunkulu weza kuLabani umAramu ephusheni ebusuku, wathi kuye: Qaphela ukuba ungakhulumi kuJakobe okuhle noma okubi.

²⁵ ULabani wayesemfica uJakobe; uJakobe wayemise itende lakhe entabeni, uLabani nabafowabo bamisa entabeni iGileyadi.

²⁶ ULabani wathi kuJakobe: Wenzeni, lokhu webe inhliziyo yami, wathatha amadodakazi ami njengabathunjwa benkemba, na?

²⁷ Ubalekeleni ngasese na? Webelani kimi na? Wangangitshela ngani na?; ngokuba bengizokuvalelisa ngokwenama, nangezihlabelelo, ngezigubhu nangamahabhu, na?

²⁸ Awungivumelanga ukuba ngange amadodana ami namadodakazi ami. Manje usuntumazekile ngenxa yalokho.

²⁹ Kusemandleni esandla sami ukwenza okubi kuwe, kepha uNkulunkulu kayihlo ukhulumile kimi ebusuku bayizolo, wathi: Qaphela ukuba ungakhulumi kuJakobe okubi noma okuhle.

³⁰ Manje njengokuba usumuka impela, lokhu ulangazelela nokulangazelela indlu kayihlo, uzebeleni izithixo zami na?

³¹ UJakobe waphendula wathi kuLabani: Ngoba bengesaba; ngokuba ngithe: Mhlawumbe uzongiqhwaga amadodakazi akho.

³² Kepha lowo ozothola kuye izithixo zakho akayukusinda; qaza phambi kwabafowethu okwakho okukimi, ukuthathe. Ngokuba uJakobe wayengazi ukuthi uRasheli wayezebile.

³³ ULabani wayesengena etendeni likaJakobe, nasetendeni likaLeya, nasetendeni lezincekukazi zombili, wangazithola; waphuma etendeni likaLeya, wangena etendeni likaRasheli.

³⁴ URasheli wayewathathile amatherafim, wawafaka esihlalweni sekameli, wahlala phezu kwawo. ULabani waphumputha etendeni lonke, kepha wangawathola.

³⁵ Wathi kuyise: Mayingabibikho intukuthelo emehlweni enkosi yami ngokuthi anginakusukuma phambi kwakho, ngokuba indlela yabesifazane iphezu kwami. Wanyalula, kepha wangawathola amatherafim.

³⁶ UJakobe wacasuka, wamsola uLabani; uJakobe waphendula wathi ku -Labani: Yisiphi isiphambeko sami na? Yisiphi isono sami, lokhu ungizingele kangaka, na?

³⁷ Njengoba usufunisisile kuzo zonke izitsha zami, utholeni yezitsha zonke zendlu yakho na? Yibeke lapha phambi kwabafowethu nabafowenu ukuba banqume phakathi kwethu sobabili.

³⁸ Leminyaka engamashumi amabili bengihlezi kuwe; izimvukazi zakho nezimbuzikazi zakho kaziphunzanga; nezinqama zomhlambi wakho angizidlanga.

³⁹ Ezidweshulwe yizilo ngangingaziyisi kuwe; yimina engangilahlekelwa; wazibiza esandleni sami, noma zebiwe emini noma zebiwe ebusuku.

⁴⁰ Nganginjalo: Emini ngangiqedwa wukushisa, ebusuku ngiqedwa ngamakhaza; ubuthongo bami babubalekela amehlo ami.

⁴¹ Leminyaka engamashumi amabili bengisendlini yakho; ngakusebenzela iminyaka eyishumi nane ngamadodakazi akho omabili, neminyaka eyisithupha ngomhlambi wakho; nawe uguqule umvuzo ngezindlela eziyishumi.

⁴² Ukuba uNkulunkulu kababa, uNkulunkulu ka-Abrahama, uKwesaba kuka-Isaka, ubengenami, ngempela ubuyokungimukisaze. UNkulunkulu ubonile ukuhlupheka kwami nokukhathala kwezandla zami, wahlulela ebusuku bayizolo.