1
Zakeh sawchapawpa Aku biezy Massa tawhtapa cha. He chyhsa heta hetana heta a phuah: Ithiel châta, Ithiel châta nata Ukal châta tah ta:
2
Chyhsa ahrupa liata a ngâ chaipa châ na ta, chyhsapa ta pahno thaina ama hneipa he hnei leipa na ta.
3
Sona achu leipa na ta. Mopathaihpa pahnona hnei hra va na.
4
Ahyma avâ lâ kiah haw ta, a zachô heihpa cha? Ahyma a ku ta thlie a chahutuhpa cha? Ahyma a poh ta ti a chatytuhpa cha? Ahyma kaokih zydua a pa-i? Ahy a sawchapawpa moh chhao na pahno ma? Na pahno tlaina!
5
Khazohpa bie zydua cha pasiapa a châ haw; ano a ngâtuhpa zydua chata ano cha vyhphao a châ.
6
A biezy cha baichha khâ, chata leipata la cha ra aw ta, haih thaipa na châ pathlei aw na.
7
Hmo miano cha hiah na ta; ei thi hlâta a ryh tah mah y.
8
Hmo hrao leipa nata haipa zy cha kei tawhta pasie syulyu mah y; dyhchhiena tlyma hneirôna tlyma na pie hra khâ; kei châta a byuhpa pati ta na pasa mah y,
9
chata leipata la rihbie tupa ta y aw na ta, châ papha aw na ta, ABEIPA cha ahyma a châ?”ei tah pathlei aw na, cha leipa khiahta sipasapa châ aw na ta, paru aw na ta, ei Khazohpa moh ei pachhie pathlei aw na.
10
Chakaotuhpa cha a zibeipa lâta a kyh reih khâ, chhie cha sapa aw ta, thai lei na hlao tlamaw aw na.
11
Ama pawzy chhiesa pata ama nôzy byhnâ a aw pa leipa chhâ y ei ta.
12
Âmo pachâ ta pathaih a tahpa chhâ y ei ta, châhrasala ama puana pasiepa châ tlôh leipa ei ta.
13
Ama mo a sâh kaw dia tahpa chhâ y ei ta, ama mo vo zy pasâhsa ei ta.
14
Ama hâh cha zaozi hawhta, ama hâhkâpi cha chaizôh hawhpa chhâ y ei ta, alei tawhta sipasapa nata chyhsa hry tawhta a ngiana a hneipazy nie khai awpa ta.
15
“Na pie teh, na pie teh, ” tahpa ta a aw ngâpa ngahli sawchanô y ei ta. Hmo miathôh a daina a hnei leipa y ta; e, hmo miapalih a châ, “Â daih na, ” a tah beih leipazy.
16
Sheôl, chhi saw a phaoh beih leipa, ti a bie thei leipa leilô nata “Â daih na, ”a tah beih leipa mei.
17
A paw a mohnaotuhpa nata a nô bie a nawhtawpa mokhao cha, saikao liata ra-awh ta thao aw ei ta, pahmô tawzy ta ama nie aw.
18
Hmo miathôh keima châta noâhchhih tupa y ta; e, hmo miapalih ei pahno leipa cha:
19
a ruapa liata pahmô lâpi cha, alôpanô chô liata parih lâpi, tilaipi liata balyh lâpi cha, chapaw ta laihsa a pangaina lâpi zy.
20
Cha hawhna chata a châ, chanô aphei a hmâhpa lâpi cha: nie ta a hmao a hru ta, “Hmo moleipa khâpa hmah tao va na, ” a tah tyh.
21
Hmo miathôh vâta leilô a chatho tyh; hmo miapalih a châ, pasa tao thei leipa zy:
22
chakaotuhpa cha abei vaw châ ta, ahrupa cha lao nata sa ta lôhrâ tlôpa ta y ta;
23
chanô pasi a chhih ngaitapa ta vahpa vaw hnei ta, chakaotuhpa laihsa ta a zibeinô ryu a to no ta.
24
Hmo chyhpa ta miapalih alei chô liana heta y ta, châhrasala ama so kaw:
25
hloia he hmo thatlô lei ngaitapa châ ei ta, châhrasala nopi noh ta ama nie awpa ama pachô tyh;
26
tlâh pivao zy he pachyu lei ngaitapa châ ei ta, châhrasala lôpanô liata zy ama yna ama tao tyh.
27
khawsuzy heta abei hnei leipa ei ta, châhrasala a hri ta ama sie tyh;
28
zyhtôhpupazy cha na ku ta patu thei chi ta, châhrasala abei o rôhnahpazy liata ama y tyh.
29
Hmo miathôh ama yzie liata rôhnah ngaitapa y ei ta, e, miapalih a châ, ama yzie liata rôhnah ngaitapa cha:
30
chakeibarôhhneipa cha râhsa hry liata a tha tlô chai ta, khâpa ta hmahta pakuasa thei vei;
31
awhkhypa cha awhpanô hryta a khoh pachai ta, mie tôhpa chhao mie panô hry ta, abei ahy hmah ano a siehnaopa a y leipa cha.
32
Nama a pasâhsa awpa ta hmo ru ngaitapa na vaw tao haw tlyma, hmo moleipa na vaw pachâ haw tlyma a châ khiahtala, na pakah chahu teh.
33
Sâhpiti chahriapa ta sâhpiti kuapa a papuapa hawhta, hnapasu chamiehpa ta thi a vaw puapa hawhta, hie pahâhsa raruahna ta ahryuna a papua tyh.
