¹ Nang lumabas ang Israel sa Egipto, ang sangbahayan ni Jacob mula sa bayang may ibang wika;

² Ang Juda ay naging kaniyang santuario, ang Israel ay kaniyang sakop.

³ Nakita ng dagat, at tumakas; ang Jordan ay napaurong.

⁴ Ang mga bundok ay nagsiluksong parang mga lalaking tupa, ang mga munting gulod na parang mga batang tupa.

⁵ Anong ipakikialam ko sa iyo, Oh dagat, na ikaw ay tumatakas? sa iyo Jordan, na ikaw ay umuurong?

⁶ Sa inyo mga bundok, na kayo'y nagsisiluksong parang mga lalaking tupa; sa inyong mga munting gulod, na parang mga batang tupa?

⁷ Mayanig ka, ikaw na lupa, sa harapan ng Panginoon, sa harapan ng Dios ni Jacob;

⁸ Na pinapagiging tipunan ng tubig ang malaking bato. Na bukal ng tubig ang pingkiang bato.

¹ Huwag sa amin, Oh Panginoon, huwag sa amin, kundi sa iyong pangalan ay magbigay kang karangalan, dahil sa iyong kagandahang-loob, at dahil sa iyong katotohanan.

² Bakit sasabihin ng mga bansa, Saan nandoon ngayon ang kanilang Dios?

³ Nguni't ang aming Dios ay nasa mga langit: kaniyang ginagawa ang kaniyang ibigin.

⁴ Ang kanilang mga diosdiosan ay pilak at ginto, yari ng mga kamay ng mga tao.

⁵ Sila'y may mga bibig, nguni't sila'y hindi nangagsasalita; mga mata'y mayroon sila, nguni't hindi sila nangakakakita;

⁶ Sila'y may mga tainga, nguni't hindi sila nangakakarinig; mga ilong ay mayroon sila, nguni't hindi sila nangakakaamoy;

⁷ Mayroon silang mga kamay, nguni't hindi sila nangakatatangan; mga paa ay mayroon sila, nguni't hindi sila nangakalalakad; ni nangagsasalita man sila sa kanilang ngalangala.

⁸ Ang nagsisigawa sa kanila ay magiging gaya nila; Oo, bawa't tumitiwala sa kanila.

⁹ Oh Israel, tumiwala ka sa Panginoon: siya'y kanilang saklolo at kanilang kalasag.

¹⁰ Oh sangbahayan ni Aaron, magsitiwala kayo sa Panginoon: siya'y kanilang saklolo at kanilang kalasag.

¹¹ Kayong nangatatakot sa Panginoon, magsitiwala kayo sa Panginoon; siya'y kanilang saklolo at kanilang kalasag.

¹² Inalaala tayo ng Panginoon; kaniyang pagpapalain tayo: kaniyang pagpapalain ang sangbahayan ni Israel, kaniyang pagpapalain ang sangbahayan ni Aaron.

¹³ Kaniyang pagpapalain ang nangatatakot sa Panginoon, ang mababa at gayon ang mataas.

¹⁴ Palalaguin kayo ng Panginoon ng higit at higit, kayo at ang inyong mga anak.

¹⁵ Pinagpala kayo ng Panginoon, na gumawa ng langit at lupa.

¹⁶ Ang mga langit ay mga langit ng Panginoon; nguni't ang lupa ay kaniyang ibinigay sa mga anak ng mga tao.

¹⁷ Ang patay ay hindi pumupuri sa Panginoon, ni sinomang nabababa sa katahimikan;

¹⁸ Nguni't aming pupurihin ang Panginoon mula sa panahong ito hanggang sa walang hanggan. Purihin ninyo ang Panginoon.

¹ Aking iniibig ang Panginoon, sapagka't kaniyang dininig ang aking tinig at aking mga hiling.

² Sapagka't kaniyang ikiniling ang kaniyang pakinig sa akin, kaya't ako'y tatawag sa kaniya habang ako'y nabubuhay.

³ Ang tali ng kamatayan ay pumulupot sa akin, at ang mga sakit ng Sheol ay nagsihawak sa akin: aking nasumpungan ang kabagabagan at kapanglawan.

⁴ Nang magkagayo'y tumawag ako sa pangalan ng Panginoon; Oh Panginoon, isinasamo ko sa iyo, iligtas mo ang aking kaluluwa.

⁵ Mapagbiyaya ang Panginoon, at matuwid; Oo, ang Dios namin ay maawain.

⁶ Pinalalagi ng Panginoon ang mga tapat na loob: ako'y nababa, at kaniyang iniligtas ako.

⁷ Bumalik ka sa iyong kapahingahan, Oh kaluluwa ko; sapagka't ginawan ka ng mabuti ng Panginoon.

⁸ Sapagka't iyong iniligtas ang kaluluwa ko sa kamatayan, at ang mga mata ko sa mga luha, at ang mga paa ko sa pagkabuwal.

⁹ Ako'y lalakad sa harap ng Panginoon, sa lupain ng mga buhay.

¹⁰ Ako'y sumasampalataya, sapagka't ako'y magsasalita: ako'y lubhang nagdalamhati:

¹¹ Aking sinabi sa aking pagmamadali, lahat ng tao ay bulaan.

¹² Ano ang aking ibabayad sa Panginoon dahil sa lahat niyang kabutihan sa akin?

¹³ Aking kukunin ang saro ng kaligtasan, at tatawag ako sa pangalan ng Panginoon.

¹⁴ Aking babayaran ang mga panata ko sa Panginoon, Oo, sa harapan ng buo niyang bayan.

¹⁵ Mahalaga sa paningin ng Panginoon ang kamatayan ng kaniyang mga banal.

¹⁶ Oh Panginoon, tunay na ako'y iyong lingkod; ako'y iyong lingkod, na anak ng iyong lingkod na babae; iyong kinalag ang aking mga tali.

¹⁷ Aking ihahandog sa iyo ang hain na pasalamat, at tatawag ako sa pangalan ng Panginoon.

¹⁸ Aking babayaran ang mga panata ko sa Panginoon, Oo, sa harapan ng buo niyang bayan;

¹⁹ Sa mga looban ng bahay ng Panginoon, sa gitna mo, Oh Jerusalem. Purihin ninyo ang Panginoon.

¹ Oh purihin ninyo ang Panginoon, ninyong lahat na mga bansa: purihin ninyo siya, ninyong lahat na mga bayan.

² Sapagka't ang kaniyang kagandahang-loob ay dakila sa atin; at ang katotohanan ng Panginoon ay magpakailan man. Purihin ninyo ang Panginoon.

¹ Oh mangagpasalamat kayo sa Panginoon; sapagka't siya'y mabuti: sapagka't ang kaniyang kagandahang-loob ay magpakailan man.

² Magsabi ngayon ang Israel, na ang kaniyang kagandahang-loob ay magpakailan man.

³ Magsabi ngayon ang sangbahayan ni Aaron, na ang kaniyang kagandahang-loob ay magpakailan man.

⁴ Mangagsabi ngayon ang nangatatakot sa Panginoon, na ang kaniyang kagandahang-loob ay magpakailan man.

⁵ Sa aking kapanglawan ay tumawag ako sa Panginoon: sinagot ako ng Panginoon, at inilagay ako sa maluwag na dako.

⁶ Ang Panginoon ay kakampi ko; hindi ako matatakot: anong magagawa ng tao sa akin?

⁷ Ang Panginoon ay kakampi ko sa gitna nila na nagsisitulong sa akin: kaya't makikita ko ang nasa ko sa kanila na nangagtatanim sa akin.

⁸ Lalong mabuti ang manganlong sa Panginoon kay sa maglagak ng tiwala sa tao.

⁹ Lalong mabuti ang manganlong sa Panginoon kay sa maglagak ng tiwala sa mga pangulo.