1
Hy pho to, na hmiakô liata amâ chalyu nawpa ta cha dyuhtuhpazy hnohta na moh pahnosa nawpa ta, "
2
mei ta thopahrei pakâ ta, mei chata tizy a patlaosapa hawhna heta, tlâhzy cha na hmiakô liata amâ chalyu thei nawpa ta avâ kha hriepa ta na za chô mawh sala!
3
Eima hnabeisei leipa hmo rarôypa na tao nona khata, za chô chi ta, tlâhzy cha na hmiakô liata amâ chalyu ngâpa kha.
4
Hlâno tawhta chyhsazy ta nâma deita leipa ta cha âmo a hâtuhpa chata a hriapa tyhtuhpa Khazohpa pahno beih tlôh leipa ei ta, nah ta thei beih hra leipa ei ta, mo ta hmô beih hra veih ei.
5
Nâ chata thapha ngaitapa ta y ta, a sia ngaitapa ta a taotuhpa na lâpizy liata cha thei thlâh ha tyhpazy cha aly tyh chi ta. Hiehâhpa ta na yna chôta keimo ta molei haw pi ta; chazy liana chata bohpi y haw pi ta, chatanachata pachhapa ta eima y thei aw ma?
6
Chyhsa puapa hawhta y khai haw tlôh pi ta, eima siana zydua chhao chysia puapa hawhta châ ta. Eima zydua ta chhohna hawhta uah tyh pi ta; eima hraoleina zy heta thlih hawhta maniah a phaoh tyh.
7
Na moh padopa ta nâma patu awpa ta anosasyh ta a pahrâpa ahy hmah ta y vei ei; keimo tawhna heta na hmia nyu haw tlôh chi ta, eima hmoparaonazy hmâpa ta maniah na pahleipadia haw.
8
Atahmâ deikua cha hy ABEIPA y, nâ cha eima Paw châ chi ta; keimo he beihlei châ pi ta, nâ maniah a vituhpa na châ; eima zydua heta na ku hriapa eima châ.
9
Hy ABEIPA y, hiehâh ngaitapa ta y khah y, hmoparaonazy chhao chhâzaw ta a thei thlâh ha khâ. Ngiachhiepa ta maniah moh la, eima zydua heta chyhsazy eima châ hih.
10
Na khihpi pathaihpazy cha râhpathohpa lâta a lie ta, Zaio cha râhpathohpa lâta a lie ta, Zerusale cha roryhrapa lâta â lie.
11
Eima o pathaihpa nata eima o angiapa, eima pawzy ta ama cha reithai tyhna pa cha, mei ta raopa ta châ ta, eima hmo kho a chhihpa zydua cha paraopa ta y khai haw tlôh ta.
12
Hy ABEIPA y, cha hmozy liana chata na mao-oh thei aw ma, a thlih thlâh hapa ta thata rie patheisapa ta maniah na paysa aw ma?
